خورشیدبانو ناتوان قاراباغین سون خانی مهدیقلی خانین قیزی و ابراهیم خلیل خانین نوهسیدیر، بونا گؤره ده هر یئرده «خانقیزی» لقبیله تانینمیشدیر. آناسی بدرجهان بگیم ده گنجه خانی جوادخانین نوهسیدیر، ناتوان ۱۲۵۳-جی هیجری (۱۸۳۷م) شوشا شهرینده دوغولموشدور.
ناتوان خانیم ۱۸۷۲-جی میلادی ایلده میرزا رحیم فنانین امکداشلیغی ایله «مجلس انس» آدلی ادبی محفیل قورموش و داها سونرا میرمحسن نوابین قوردوغو «مجلس فراموشان»ین تشكیلینه یاردیم ائتمیشدیر. ناتوان مجلس انسه مادی یاردیم گؤستریر و مجلس عوضولرینی شعر یازماغا تشویق ائدردی. ناتوان خانیم دیگر شهرلردهکی ادبی محفللرله ده شعر و موشاعیره موناسیبتلری قورموشدور. اونونلا موعاصیر بؤیوک غزل شاعیری سیدعظیم شیروانی و دیگر گؤرکملی شاعیرلر (فنا، ناکام، نواب، صادق، پیران، وفا، بیخود، خیالی و عاصی و سایره) اونون شعرلرینه نظیرهلر یازمیشلار. بیر چوخ شاعیرلر یازدیقلاری شعرلری یوخلاماق اوچون اونا گؤندریردیلر.
ناتوان خانیم یوخسوللارا کومک ائدن، خلقین قایغیسینا قالان، الی آچیق و خیرخواه بیر قادین ایدی. قاراباغین آبادلیغینا چالیشاراق یوللاری و کؤرپولری تعمیر ائتدیردی و ۱۸۷۲م ده آلتی کیلومترلیک بیر مسافهدن شوشا قالاسینا سو کمری چکدیردی. بو سو کمری ایندی خانقیزی بولاغی آدییلا مشهوردور.