ملا محمد بن سلیمان فضولی
اوْرتا عصر آذربایجان شاعیر و مۆتفکّیری، محمّد سلیمان اوْغلو فۆضولی (۱۴۸۳-۱۵۵۶) آذربایجان-تۆرک ادبیاتی تاریخینده دیوان ژانرینین ان مؤحتشم و تاثیرلی نۆمایندهلریندن بیریدیر. فوضولی اۆچ دیلده غزل، قصیده، مۆسدّس، ترکیببند، ترجیعبند، رۆباعی، قیطعه، مۆربّع و س. یازمیشدیر. فلسفی ماهیتلی قصیدهلری، "یئددی جام"، "انیسالقلب" و "صحّت و مرض" اثرلری قوْجالیق دؤورونون محصوللاریدیر. اوْ، قصیدهلرینی آیریجا بیر اثر کیمی توْپلاییب کیتاب شکلینه سالمیش، تۆرک، فارس و عرب دیللرینده دیوانلار ترتیب ائتمیشدیر.
یارادیجیلیغینین زیروهسی اوْلان "لئیلی و مجنون" پوْئماسی آذربایجان، ائلهجه ده شرق و دۆنیا ادبیّاتینین نادیر اینجیلریندندیر. نیظامی گنجوینین ایلک دفعه یازیلی ادبیاتی گتیردیگی "لئیلی و مجنون" مؤضوعسونون بیر چوخ تۆرک، فارس، هیند، اؤزبک و تاجیک شاعیرلری طرفیندن قلمه آلینماسینا باخمایاراق، فۆضولینین آنا دیلینده یاراتدیغی اثر اوْریژیناللیغی ایله بو مؤضوعدا اوّللر یازیلمیش پوْئمالاردان سئچیلیر.