کیم دئییر، یوخودا اؤلمک آساندیر؟
دئییرلر، یوخودا اؤلمک آساندی...
اؤزون ده بیلمیرسن نئجه اؤلورسن.
سحر تئزدن ائشیدیرسن اذاندی،
یوخوداجا کیریمیشجه اؤلورسن.
بیر گؤز قؽرپیمیندا قورتولور جانین،
روحون بدنیندن اوچور قوش کیمی.
الینده قالمیرسان دردین، درمانین،
درده ده سالمیرسان ائوده هئچ کیمی.
کیم دئییر، یوخودا اؤلمک آساندی؟..
کیم بیلیر، نئجهدی یوخودا اؤلمک؟
بلکه ده، ان بؤیوک درددی، عذابدی،
ان پیس ایشگنجهدی یوخودا اؤلمک.
بیر گؤز قؽرپیمیندا یوخودا بلکه
ایللرجه بئلینده داش داشیییرسان.
نفسین کسیلیر آخیردا بلکه،
عؤمرونو داشلارا باغیشلاییرسان.
بیر گؤز قؽرپیمیندا یوخودا بلکه
جلّاد بالتاسییلا اۆزولور باشین.
اوردا قؽزیل قانین آخاندا بلکه
یاستیغا سۆزولور اوردا گؤز یاشین.
یوخودا اؤلمکدی ان راحات اجل...
بو دا، بیر یالانچی تسلّیدیمی؟
گؤرهسن یوخودا سنی بوغان ال
دۆشمن الیدیمی، دوست الیدیمی؟!
نهدی بیرجه آندا عؤمره سون قویان؟
بئینه آخیب سؽزان بیر داملا قاندی.
کیمدی قبرین اۆسته ان برک آغلایان؟
بلکه ده، یوخودا سنی بوغاندی.
گئجه قورخو چؤکر یوخوموزا دا؛
ترپنر کیمینسه قارا کؤلگهسی.
بلکه حاصار چکک یوخوموزا دا،
هئچ کس یوخوموزا گیره بیلمهسین.
بلکه هئچ یاتمایاق -هر یاتانین دا
اگر اویانماماق قورخوسو وارسا.
بلکه هئچ یاتمایاق -عؤمرون سونوندا
اونسوز دا، بیر اجل یوخوسو وارسا.
اما یوخون گلیر -گؤرورم ائله؛
داها یاواش-یاواش یومولور گؤزون.
یات... صاباح اویانماق اۆمیدی ایله...
یوخون شیرین اولسون -
اویو، عزیزیم...